A Eurocidade aborda coa Deputación de Pontevedra os proxectos de futuro

A Eurocidade Cerveira-Tomiño e a Deputación de Pontevedra fan unha fronte común para “aproveitar o momento” e levar adiante proxectos de futuro reclamando unidos a inxección de novos fondos europeos do ‘Next Generation’. A presidenta da Deputación, Carmela Silva, e o deputado para a Cooperación transfronteiriza, Uxío Benítez, reuníronse co novo alcalde de Vila Nova de Cerveira, Rui Teixeira, e coa rexedora de Tomiño, Sandra González para abordar proxectos como a nova ponte peonil. “É importante desenvolver e implementar unha estratexia consensuada que contribúa a afianzar os lazos de amizade e colaboración en proxectos comúns ás poboacións e institucións portuguesas e galegas”, salientou o alcalde cerveirense.

Durante o encontro debateuse sobre asuntos específicos como o proxecto do Parque da Amizade Cerveira-Tomiño, pero tamén doutros proxectos integrais froito dunha radiografía do enorme potencial do que dispón o territorio transfronteirizo nas máis diversas áreas.

O encontro, que tivo o seu momento institucional coa sinatura do rexedor cerveirense e da alcaldesa de Tomiño Sandra González no libro de honra da Deputación, serviu tamén como xornada de traballo para poñer sobre a mesa os avances na tramitación da construción da ponte peonil que unirá Tomiño e Cerveira. A alcaldesa Sandra González indicou que a ponte é un proxecto “para revalorizar o territorio, un espazo único e transfronteirizo que debe ser exemplo de sustentabilidade amais dunha irmandade entre Tomiño e Vila Nova de Cerveira. Os Fondos Next Generation deben darlle o empurrón final”.

Neste sentido, anunciouse que xa existen informes sectoriais positivos das administracións competentes e que hai boa predisposición tanto a nivel autonómico como estatal para conseguir fondos europeos que financien a obra, aínda que é preciso pechar compromisos en firme e agardar a distribución final dos cartos. Respecto ao proxecto do Parque da Amizade, Carmela Silva subliñou que máis alá da calidade da obra arquitectónica, será “un vínculo de unión para crear estratexias e accións conxuntas e garantir dereitos e servizos a ambos lados do Miño”. Cualificouno como “innovador” e “unha excelencia”, para a que “temos o compromiso do Goberno para recibirnos e tomar conciencia de cal é este proxecto”.

Pola súa banda, o deputado Uxío Benítez, subliñou que o proxecto gañador para esta ponte chegou da man da UTE de Burgos&Garrido e o enxeñeiro Alejandro Bernabeu e que o resultado é un proxecto que se adapta á contorna e que permitirá unir ambas beiras do río nun parque transfronteirizo.