A Eurocidade Cerveira-Tomiño inaugura a súa primeira Semana Europea do Deporte con actividades sen fronteiras

A Semana Europea do Deporte arrancou onte de maneira oficial na Eurocidade Cerveira-Tomiño coa súa primeira edición transfronteiriza. O acto inaugural tivo lugar no Auditorio Municipal de Vila Nova de Cerveira, onde se deron cita diversas asociacións deportivas de ambas as marxes do río Miño, representando unha ampla variedade de modalidades deportivas practicadas neste territorio compartido.

A cerimonia de apertura contou coa intervención de personalidades destacadas, como o Presidente da Cámara Municipal de Vila Nova de Cerveira, Rui Teixeira; a alcaldesa de Tomiño, Sandra González; e o Director da Delegación Rexional do Norte do Instituto Portugués do Deporte e Xuventude, Vítor Baltazar Dias.

O presidente Rui Teixeira destacou que “Cerveira e Tomiño están situadas entre o río e a montaña, un espazo natural único que invita á exploración e á práctica de exercicio físico, tan beneficioso para a saúde e o benestar. O deporte e a xuventude son prioridades da Eurocidade, e estamos a traballar cunha axenda común que daremos a coñecer nas escolas, para que a mocidade coñeza as asociacións e modalidades deportivas dispoñibles e poidan elixir onde practicar”.

Pola súa banda, a alcaldesa de Tomiño, Sandra González, subliñou a importancia de convivir e coñecerse a través do deporte: “Queremos transmitir aos nosos mozos a mensaxe de que o deporte é unha maneira de convivir e coñecernos mellor. Temos o río Miño, que pode ser visto como un gran club da Eurocidade, e o noso obxectivo é que as asociacións de ambos concellos traballen xuntas, pois temos moito que gañar con esta colaboración”.

Vítor Baltazar Dias, director do Instituto Portugués do Deporte e Xuventude, resaltou que “temos aquí un río que une dúas comunidades, a súa cultura, a súa historia e o seu vasto patrimonio. En tempos como os actuais, é fundamental destacar a importancia de estar xuntos e acoller aos demais. O deporte ten unha importancia transcendental, e detrás de cada medalla hai un traballo esencial dos atletas e dos clubs que os forman”.

Baixo o lema “Deporte sen fronteiras, sen idade e sen xénero”, a Eurocidade Cerveira-Tomiño organizará, entre o 23 e o 29 de setembro, unha serie de actividades deportivas gratuítas. Atletismo, baloncesto, boxeo, fútbol, piragüismo, remo, ciclismo e moitas outras modalidades estarán dispoñibles para persoas de todas as idades.

O reto está lanzado ás asociacións e á cidadanía de todas as idades de ambos concellos, co obxectivo de fomentar a práctica regular de actividade física durante todo o ano para adoptar un estilo de vida saudable.

Toda a programación dispoñible en: https://bit.ly/3XDDsrT