O río Miño transfronteirizo actuará como un ‘lobby’ para captar fondos europeos

A Eurocidade Cerveira-Tomiño, AECT Rio Minho, CIM Alto Minho e representantes dos concellos das dúas beiras do Miño transfronteirizo e dos Ministerios de Facenda e Reto Demográfico participaron nunha xornada de traballo en Tui organizada pola Deputación de Pontevedra para preparar os proxectos do río Miño con cargo ao Marco Financeiro Europeo 21-27. Un encontro no que se afondou sobre as necesidades e posibles novos proxectos para inxectar fondos europeos no territorio miñoto, toda vez que nestes momentos é de vital importancia reactivar economicamente a zona transfronteiriza do Miño tras o impacto dobre da pandemia da COVID polo peche de fronteiras, segundo explicou o deputado de Cooperación Transfronteiriza, Uxío Benítez.

Entre outras presentacións, celebrouse unha mesa redonda sobre as oportunidades de financiamento europeo na que participou o presidente da cámara municipal de Cerveira, Rui Teixeira, quen defendeu “máis recursos financeiros para os territorios de fronteira” e identificou un conxunto de proxectos estruturantes no territorio para o período 2021-2027, a Rede de Eurocidades do Rio Miño e a descarbonización do territorio, así como a recualificación do rio Miño internacional.

Nesa mesa tamén participaron o subdirector xeral da Subdirección Xeral de Cooperación Territorial Europea da Dirección Xeral de Fondos Europeos do Ministerio de Facenda, Adrián Vecino, e o asesor do gabinete da Secretaría Xeral para o Reto Demográfico do Ministerio para a Transición Ecolóxica e o Reto Demográfico, Miguel Ángel Pérez Grande. O encontro foi pechado polo presidente da CIM Alto Minho e rexedor de Melgaço, Manoel Batista, e pola presidenta de Deputación de Pontevedra, Carmela Silva.

Proxectos

Entre os proxectos que se trataron destacou a creación do Anel Verde do Miño, unha rede de sendeiros que unidos conforman circuíto continuo de 196 quilómetros polas ribeiras do río entre Galiza e Portugal, que será un dos obxectivos prioritarios e estratéxicos na solicitude de fondos europeos para o territorio transfronteirizo do Miño no marco financeiro 2021-2027. A proposta de longo percorrido pretende servir como artellador do territorio tanto a nivel de mobilidade como de turismo sustentable e saudable.