A Eurocidade capta 400.000€ de fondos europeos para impulsar o Parque Agroindustrial

O concello de Tomiño desenvolverá xunto a Cerveira e a Universidade de Vigo un proxecto para consolidar un polo agroindustrial na Eurocidade Cerveira-Tomiño

O Concello de Tomiño capta de novo arredor de  400.000 euros de fondos europeos para poñer en marcha o proxecto Eurocidade Intelixente, unha iniciativa conxunta con Vila Nova de Cerveira e a Universidade de Vigo que permitirá dar impulso definitivo ao Parque Agroindustrial, actualmente en tramitación urbanística. O investimento total deste proxecto superará os 520.000 euros e servirá como aval para consolidar un verdadeiro polo industrial transfronteirizo.

O proxecto aposta pola especialización intelixente, a innovación e a sustentabilidade nos sectores agrícola e industrial, creando un ecosistema emprendedor máis competitivo e resiliente. Entre as accións previstas destacan a elaboración dunha Axenda Estratéxica de Especialización Intelixente e Transición Industrial, o mapeo do tecido empresarial e dos axentes clave da Eurocidade ou a formulación dun plan estratéxico conxunto para os próximos anos.

A alcaldesa, Sandra González, destacou o traballo de Tomiño, que “unha vez máis é pioneiro na captación de fondos europeos e que suma aos máis de 5 millóns de euros de fondos europeos que se executarán este 2026”. Solicitado xa o ano pasado, “o proxecto permitirá a dinamización e empurre definitivo ao Parque Agroindustrial, reforzando a economía local, xerando emprego e mellorando a calidade de vida da veciñanza. Unha boa nova que demostra que todo o esforzo que facemos dende o Concello para captar fondos europeos dá os seus froitos”, recalcou a rexedora.

O plan inclúe tamén accións de apoio ao emprendemento e á atracción de novas empresas ao Parque Agroindustrial Transfronteirizo, programas de incubación e aceleración de startups, así como a implantación de tecnoloxías innovadoras como automatización, Internet das Cousas (IoT) e economía circular. A Universidade de Vigo colaborará no desenvolvemento de competencias para a especialización intelixente, formación técnica, alianzas estratéxicas e na creación dun Laboratorio de Innovación para a Sustentabilidade.

Con este proxecto financiado con fondos INTERREG VA POCTEP, Tomiño e Cerveira consolidan unha cooperación transfronteiriza que converte a Eurocidade nun motor de desenvolvemento económico, social e ambiental para toda a comarca, reafirmando a visión do Miño como un eixo de unión e progreso compartido.