Alcaldes e alcaldesas da fronteira continúan coa súa loita para a apertura das pontes de Salvaterra, Goián e Tui para traballadores transfronteirizos
9 Xuño, 2020
Solicítase unha liña específica de apoio aos concellos transfronteirizos
15 Xuño, 2020A Eurocidade volverá estar conectada para traballadores e empresas dende o 15 de xuño
O delegado do Goberno en Galicia informou da reapertura de tres pasos fronteirizos entre Galicia e Portugal, entre eles o que une a Eurocidade de Tomiño e Vila Nova de Cerveira. Será de luns a venres de 08.00 a 22.00 h
A Eurocidade volverá a estar conectada para traballadores e traballadoras e empresas dende o vindeiro luns 15 de xuño. O delegado do Goberno en Galicia, Javier Losada, informou hoxe da apertura de tres novos pasos fronteirizos entre Galicia e Portugal, entre eles o que une a Eurocidade de Tomiño e Vila Nova de Cerveira. Tamén se reabrirán os que comunican Salvaterra do Miño con Monçao e Arbo con Melgaço.
Así, desde o día 15 de xuño restablecerase a circulación de luns a venres entre as 08.00 e as 22.00 horas.
Resposta positiva
Losada subliñou a resposta positiva do ministro de Interior, Fernando Grande-Marlaska, á solicitude exposta polos municipios galegos nas últimas semanas co fin de favorecer a comunicación co norte de Portugal tendo en conta que o fluxo habitual interrompeuse pola pandemia.
O delegado do Goberno valorou a sensibilidade do Goberno de España e do Ministerio de Interior, á vez que agradeceu a decisión que permite incorporar tres pasos fronteirizos aos que se manteñen abertos desde o inicio da crise sanitaria. Até agora permitíase o tránsito entre fronteiras en Tui (Pontevedra)-Valença e Verín (Ourense)-Chaves. A estes dous pasos sumouse de maneira provisional durante as últimas semanas o de Calvos de Randín (Ourense) con Tourén.
Reclamación dos municipios do Miño
Desta maneira frutifican tamén as conversacións que o delegado do Goberno mantivo nas últimas semanas coa Agrupación Europea de Cooperación Territorial do Río Miño Transfronteirizo (AECT Río Minho) para analizar a situación. Naquel encontro, no que tamén participou a Cámara Municipal de Vilanova de Cerveira, Losada escoitou as propostas de reapertura de fronteiras e comprometeuse a trasladar estas peticións ao Ministerio de Interior, que agora dá resposta coa reapertura de tres novos pasos fronteirizos.
Con iso, continúa o proceso de desescalada e o avance cara a unha nova normalidade que permitirá recuperar os fluxos de tráfico e a convivencia entre os veciños dos municipios fronteirizos de Galicia e Portugal.
Sempre dentro dos protocolos de seguridade e atendendo ás medidas adoptadas por cada país, Javier Losada avogou por favorecer a coordinación entre España e Portugal neste proceso para facilitar a comunicación, pero sempre garantindo a saúde das persoas.
