Juan Carlos Triñanes Buceta gaña o primeiro premio do XI Certame de Pintura ao aire libre Antonio Fernández

José Luis García Miranda recibiu o segundo premio e o terceiro foi para Rocío Romero García

A undécima edición do Certame de Pintura ao aire libre Antonio Fernández celebrouse con éxito de participación o 20 de agosto. O certame realizouse de forma simultánea nas vilas fronteirizas de Tomiño e Vila Nova de Cerveira, e contou coa participación de máis de 50 artistas, que retrataron in situ diferentes paisaxes do percorrido do Río Miño ao seu paso por estas localidades, tanto na marxe galega coma na portuguesa.

Obras gañadoras
Na categoría de adultos, Juan Carlos Triñanes Buceta resultou gañador do primeiro premio do certame, dotado con 1.500 euros e patrocinado polo Concello de Tomiño. Pola súa banda, o segundo posto foi para José Luis García Miranda, e o terceiro para Rocío Romero García, ambos premios dotados con 500 euros e patrocinados pola Comunidade de Montes de Goián e pola Fundação Bienal de Arte de Cerveira.
Na categoría xuvenil, de 12 a 17 anos, Uxía Soto Costas fíxose co primeiro premio e na categoría infantil (ata 11 anos), resultou gañador Xuan Antonio González Prol. Os premios nestas categorías constaban dun diploma conmemorativo do certame e material de debuxo e pintura para seguir afianzando a súa paixón pola arte.
O xurado estivo formado por artistas de ambas beiras do Miño. Pola parte portuguesa, integrárono as pintoras Mafalda Santos e Ana Maria Pintora, mentres que pola parte galega fixérono as artistas plásticas Conchi García Rodríguez e Gemma Marqués. A alcaldesa de Tomiño, Sandra González, presidiu o acto de entrega dos premios, agradecendo a participación e o éxito de público con que o certame encheu Goián e Cerveira durante toda a xornada, dinamizando as súas rúas e espazos naturais, afianzándoos como un escenario perfecto para a celebración da arte.

Exposición das obras participantes
As obras participantes no Certame de pintura poderán ser visitadas no Centro Goianés ata o 3 de setembro. Deste xeito, o público poderá desfrutar da arte de pintores, tanto consolidados como noveis, que se achegaron ao Miño para pintar as súas paisaxes.
O Certame de pintura ao aire libre Antonio Fernández forma parte das actividades desenvolvidas pola Eurocidade Cerveira Tomiño.