Muller con emprego na industria, perfil maioritario dos traballadores transfronteirizos afectados polo peche de fronteiras

Tras o lanzamento do rexistro online dirixido ás persoas da raia miñota afectadas polo peche de fronteiras entre Portugal e España, a Agrupación Europea de Cooperación Territorial (AECT) Río Miño analizou os 200 testemuños recollidos, de forma voluntaria, entre o 2 e o 18 de marzo, concluíndo que o perfil maioritario incide sobre o sexo feminino e con posto de traballo no sector industrial.

Un dos datos estatísticos máis relevantes é a diferenza significativa no que respecta ao xénero das persoas rexistradas, xa que 62% son mulleres e 37% son homes. En canto ao sector económico prevalecente, a análise efectuada revela que o sector industrial é o que emprega un maior número de persoas (50%), seguido do sector de servizos, do comercio e, finalmente, da administración e servizos públicos.

Grave aumento de distancia e tempo

Cando son preguntados sobre o maior prexuízo provocado polo peche de fronteiras, os testemuños inciden sobre o grave aumento da distancia e tempo no traslado entre a residencia e o local traballo e viceversa, por seren obrigados a facer grandes desvíos da ruta, así como a agardar nos puntos de control. Un 25,29% dos afectados acusa un incremento notable no custo dos seus traslados, algo compatible coa primeira causa; o 12,94% das persoas comunica que a actual situación foi mesmo impeditiva para se presentar ao posto de traballo; e o 1,76% da mostra alegou un prexuízo puramente económico, derivado da diminución do número de clientes oriundos da outra marxe.

O lanzamento deste rexistro voluntario online, e a respetiva análise, revelan que o restablecemento da fronteira entre os dous estados ibéricos, acordado a 31 de xaneiro de 2021, preséntase como un retroceso a todos os niveis para o territorio do río Miño transfronteirizo, en particular polos impactos sociais e económicos, corroborando que ambos os dous gobernos descoñecen a situación real que se vive neste territorio común.

O formulário continúa dispoñible online na web do Smart Minho, solicitando datos relativos ao tipo de prexuízo sufrido polas traballadoras e traballadores transfronteirizos, como perdas de tempo, aumento de custos da viaxe ou redución de clientela. O obxectivo desta recollida é que poidan servir de base reivindicativa de compensacións para o territorio e  ser remitida ás entidades nacionais e europeas competentes.

En vigor polo menos ata o día 5 de abril

O peche da fronteira entre Portugal e España, decretado a 31 de xaneiro deste ano, continuará en vigor polo menos ata o día 5 de abril, manténdose unicamente aberto 24 horas o punto autorizado de Valença-Tui e parcialmente os de Monção- Salvaterra, Melgaço-Arbo e Ponte da Barca- Lóbios, con seis horas diarias para persoas con necesidade para cruzar a raia minhota.