Xa podes usar as bicicletas eléctricas do E-Bike Rio Minho en Cerveira e Tomiño
11 Xullo, 2022
A Eurocidade colabora no proxecto “As fronteiras do século XXI” da Universidade de Vigo
18 Xullo, 2022Representantes da Eurocidade presentaron en Bulgaria e Serbia iniciativas en defensa do medio ambiente
A experiencia de compostaxe de Tomiño e o Aquamuseu de Cerveira protagonistas dunha nova reunión do proxecto BRIDGE
As cidades de Slivnitsa (Bulgaria) e Dimitrovgrad (Serbia) acolleron entre o 19 e o 23 de xuño a cuarta reunión do proxecto Building Relationships into a Democratic Goal for Europe (BRIDGE). A xuntanza internacional, organizada pola Asociación búlgara de Municipios do Suroeste (ASWM), analizou proxectos de éxito no ámbito das actividades sociais, culturais, ecolóxicas e civís dos diferentes socios do proxecto.
Na reunión participaron, ademáis de autoridades públicas locais e nacionais, como a coordinadora da ASWM ou o alcalde da cidade serbia de Dimitrovgrad, representantes da Eurocidade Cerveira-Tomiño e das outras nove cidades integrantes do proxecto. A concelleira de Medio Ambiente tomiñesa Ana Belén Casaleiro e a técnica de biorresiduos Sandra Alonso Fernández presentaron a experiencia de compostaxe e coidado medioambiental levada a cabo polo Concello de Tomiño nos últimos anos. Por parte da Câmara de Vila Nova de Cerveira participaron, entre outros, Manuela Ferreira, coordinadora do proxecto BRIDGE; Lurdes Cunha, professora; e o director do Aquamuseu, Carlos Antunes.
As representantes da Eurocidade deron conta tamén da intención de expandir as liñas de cooperación transfronteiriza actualizando a Axenda Estratéxica de Amizade Cerveira–Tomiño (2015), en base ás políticas urbanas da Unión Europea e dos ODS das Nacións Unidas.
Durante o encontro, realizáronse visitas culturais aos lugares máis peculiares e tradicionais da zona, como a cidade de Sofía, a de Dimitrovgrad, o Mosteiro de Poganovo en Serbia ou o Mosteiro de Rila en Bulgaria.
Nos seus 24 meses de duración, o proxecto BRIDGE foi celebrando distintos eventos nos lugares elixidos durante a fase de deseño: o primeiro en Vila Nova de Cerveira e Tomiño en outubro de 2021; o segundo no condado de Borsod-Abaúj-Zemplén/Rozsnyó Város (Hungría-Eslovaquia) en marzo de 2022; o terceiro en Gorizia/Nova Gorica (Italia-Slovenia) en maio de 2022, e o cuarto en Slivnitsa/Dimitrovgrad (Bulgaria-Serbia) en xuño deste mesmo ano. O quinto e último celebrarase en Panevėžys (Lituania)/Daugavpils (Letonia) no vindeiro mes de setembro.
Financiado en 2019 pola Comisión Europea e coordinado polo municipio de Vila Nova de Cerveira (Portugal), o BRIDGE forma parte do programa “Europa cos cidadáns 2014-2020”, concretamente do capítulo “Compromiso democrático e participación cidadá”. O seu obxectivo é promover a cohesión social a través das fronteiras, polo que cada unha das once vilas europeas implicadas debe desenvolver prácticas sólidas e eficaces de cooperación para compartilas con outros socios durante os distintos encontros internacionais.
