URBACT incentiva a ampliación da boa práctica ‘Olympics4All’ a máis cidades europeas

Pola súa acción “impactante, participativa, integrada e relevante”, o proxecto ‘Olympics4ALL’ no que participa a Eurocidade Cerveira Tomiño podería ser replicado en máis cidades europeas. Recentemente recoñecido como unha das 116 boas prácticas URBACT a nivel europeo, a súa esencia e o impacto positivo están a ser amplamente divulgados nos canais de comunicación URBACT, coa vista posta na participación no Festival de Cidades URBACT 2025, previsto do 8 ao 10 de abril en Wroclaw, Polonia.

Durante os tres días do evento, e cunha asistencia esperada de 600 participantes, Cerveira e Tomiño presentarán con máis detalle a evolución e os resultados do ‘Olympics4All’ na saúde e benestar social da poboación sénior, ofrecendo unha oportunidade para incentivar a outras cidades europeas a implementar este proxecto de envellecemento activo, construíndo parcerías enmarcadas nunha Rede de Transferencia URBACT impulsada por unha Call for Transfer Networks de abril a xuño.

Nos canais de comunicación URBACT, a transferencia desta boa práctica ‘Olympics4All’ a outras cidades baséase nos serios desafíos que o envellecemento supón para os sistemas de protección social de Europa e o desenvolvemento local e rexional (Axenda Territorial 2030), así como na necesidade urxente de crear medidas que promovan a inclusión, a saúde e o benestar das persoas maiores.

O enfoque innovador do ‘Olympics4all’ reside na competición, nos xogos deportivos adaptados para ser máis accesibles e divertidos para os maiores, e no papel da cidadanía como principais beneficiarios e impulsores. O potencial de replicación deste proxecto preséntase como “enorme”, pois, ademais dos beneficios para calquera territorio envellecido, tamén pode promover a inclusión social e estilos de vida saudables entre outros grupos vulnerables, como migrantes, por exemplo (práctica aliñada cos Obxectivos de Desenvolvemento Sostible 1, 3, 10 e 11).

Co obxectivo de replicar esta boa práctica noutros territorios envellecidos, implementáronse os proxectos IN COMMON SPORTS e IN COMMON SPORTS+ (ERASMUS+), que chegaron a España, Italia, Eslovenia, Hungría e Bulgaria. Ata a data, máis de 1.000 maiores adestran semanalmente e participaron en máis de 30 competicións deportivas e xogos intermedios organizados en seis países.

A esencia do proxecto conseguiu alcanzar diversos niveis europeos, acadando recoñecementos destacados, sendo o máis recente en 2023 ao gañar o Premio #BeActive Across Generations. Así mesmo, a obtención do selo de Boas Prácticas URBACT, cunha puntuación entre o 80% e o 100%, foi outorgada polo Comité de Seguimento de URBACT, representado polos Estados Membros e Socios da UE, pola Comisión Europea, polos Países do IPA, polo Comité das Rexións Europeo e polo Consello dos Municipios e Rexións de Europa.

https://urbact.eu/good-practices/olympics4all-communities-active-ageing

https://urbact.eu/events/2025-urbact-city-festival