I Corrida de Reis Cerveira-Tomiño reaxendada para o 2 de febreiro

Tras un adiamento forzoso alleo á organización, a I Corrida de Reis – Trofeo Ponte da Amizade, promovida pola Eurocidade Cerveira-Tomiño (prevista inicialmente para o 11 de xaneiro), terá lugar este domingo, 2 de febreiro, coa participación de arredor de 200 atletas, tanto portugueses como españois. A proba realizarase durante a mañá e non ao final da tarde.

Co obxectivo de fomentar a igualdade de xénero no deporte, este evento transfronteirizo conta co padroado dunha dupla de atletas recoñecidos: Miguel Ribeiro e Jessara Xavier. En estreita colaboración coa Pedal’Arte de Vila Nova de Cerveira e a Sociedade Atlética do Trega de Tomiño, o desafío proposto a atletas federados e non federados consiste nunha carreira de 10 km de atletismo en estrada, en diferentes categorías de idade (maiores de 18 anos), tanto en masculino como en feminino. A saída terá lugar na Avenida Ordóñez de Goián (Tomiño) ás 10.00 h (hora portuguesa) e a meta estará situada na Av. dos Pescadores de Vila Nova de Cerveira.

Incluída no proxecto 021 – Rede Gov Miño, financiado polo POCTEP INTERREG V-A, a I Corrida de Reis – Trofeo Ponte da Amizade ten como obxectivo erradicar estereotipos, incentivando a participación igualitaria e demostrando que os desafíos e obxectivos poden alcanzarse independentemente do xénero.

Cabe destacar que, durante o proceso participativo da Axenda Urbana 2030, a Eurocidade Cerveira-Tomiño detectou un especial interese na necesidade de coordinar as políticas de igualdade entre homes e mulleres, impulsando iniciativas que faciliten a conciliación da vida laboral, familiar e persoal.