A Eurocidade Cerveira-Tomiño adia ata setembro o IV Simposio Internacional de Escultura do Minho

Ante o actual contexto de incertidume provocado pola pandemia da COVID-19, o Comité de Gestão Estratégica (CGE) da Eurocidade Cerveira-Tomiño decidiu reaxendar para o mes de setembro a realización da 4ª edición do Simposio Internacional de Escultura do Minho. Durante a reunión celebrada este martes por videoconferencia, os alcaldes veciños abordaron tamén o tema do peche de fronteiras e o seu impacto para as traballadoras e traballadores transfronteirizos.  

Cun investimento municipal de 150.000 euros, dividido por ambos os dous concellos, o plan de actividades da Eurocidade Cerveira-Tomiño previsto para este 2021 poderá ser totalmente reorientado en función da situación epidemiolóxica, como xa aconteceu en 2020.

Neste momento, e aínda á espera do que pode ou non ser executado no período de verán, o Comité de Gestão Estratégica (CGE) da Eurocidade Cerveira-Tomiño aprovou o adiamento para o mes de setembro da 4ª edição do Simpósio Internacional de Escultura do Minho que tería lugar entre o 1 e o 20 de xuño, e cuxa esencia é a creación de obras de arte en vivo en plena interacción co público e coa natureza.

Peche de fronteiras

Aínda que non constaba na orde do día da reunión, pero debatido pola urxencia e o impacto diario nas poboacións de fronteira, o presidente da Câmara Municipal de Vila Nova de Cerveira e a alcaldesa do Concello de Tomiño, Fernando Nogueira e Sandra González, respetivamente, abordaron o tema do peche das fronteiras, estando en pleno acordo da necesidade do control sanitario como medida de contención da Covid-19, pero sen prexudicar ás traballadoras e traballadores transfronteirizos e aos transportes de mercadorías.

A Eurocidade Cerveira-Tomiño apoia incondicionalmente a reivindicación do Agrupamento Europeo para a Cooperación Territorial (AECT) Rio Minho para a apertura dos oito puntos de paso entre o Alto Minho e Galiza, entre os que se atopa a Ponte Internacional da Amizade Cerveira-Tomiño, polo menos para aquelas persoas que teñen que circular entre ambas fronteiras para traballar. Existe a esperanza de que o Conselho de Ministros do goberno portugues, que se reunirá nos vindeiros días, poida ser sensible a esta problemática, procedendo a cambios nas medidas restritivas en vigor, facilitando as rutinas diarias e evitando as chocantes, vergoñantes e interminables colas con quilómetros no único punto de paso autorizado, Valença-Tui.