Cerveira e Tomiño presentan o seu Parque da Amizade ao delegado do Goberno español

A dirección da Agrupación Europea de Cooperación Territorial do Río Miño (AECT Río Miño), Fernando Nogueira e Uxío Benítez, e a alcaldesa do Concello de Tomiño, Sandra González, reuníronse por videoconferencia co delegado do Goberno español para presentar o proxecto transfronteirizo do Parque da Amizade, que unirá os concellos fronteirizos de Vila Nova de Cerveira e de Tomiño a través dunha ponte peonil e ciclable sobre o río Miño.

Tras se informar do obxectivo deste proxecto moi singular no contexto europeo e do actual punto de situación, o delegado Javier Losada manifestou o seu interese e comprometeuse a acompañar a tramitación do proceso xunto dos órganos estatutais involucrados, poñendo todos os esforzos para sensibilizar ao Goberno de Madrid sobre a importancia desta conexión.

Durante o encontro, os responsables do AECT Río Miño e da Eurocidade Cerveira-Tomiño subliñaron os pormenores desta nova área de lecer de carácter transfronteirizo, de elevado valor natural, turístico e social, e coa perspetiva dunha conexión á rede de camiños verdes transfronteirizos.

A unión de dous espazos urbanos próximos

Valorizando a integración persoas-natureza xa vivenciada e promovida, o Parque da Amizade Cerveira-Tomiño é a unión de dous espazos urbanos próximos, o Parque de Lecer do Castelinho (Vila Nova de Cerveira) e o Espazo Fortaleza de Goián (Tomiño), cunha área aproximada de 25 ha (incluíndo a expansión prevista do lado portugués). Ambas as dúas zonas comparten o mesmo espazo natural e son vividos da mesma forma polos seus usuarios. A visión de futuro é a de dar corpo a un espazo verdadeiramente europeo, sen fronteiras, físicas ou psicolóxicas, de respecto pola diferenza, pola liberdade e polo ambiente, onde se estabelecen relacións humanas de socialización, lecer, deporte, coñecemento da memoria ambiental e cultural do río, nun ambiente de equilibrio entre o home e a natureza.

Non obstante, o proxecto máis ambicioso para a concreción do Parque da Amizade é a construción dunha travesía peonil e ciclable con menos de 300m sobre o río Miño que permitirá crear o primeiro espazo público de utilización colectiva transfronteiriza, símbolo dun novo paradigma civilizacional, o paradigma da dilución cultural e psicolóxica das fronteiras.

Proxecto VISIT_RIO_MINHO

O Parque da Amizade enmárcase no proxecto VISIT_RÍO_MIÑO presentado á primeira convocatória do Programa Operacional España-Portugal ( POCTEP) 2014-2020 Interreg VA nunha candidatura conxunta da Deputación de Pontevedra coa CIM Alto Miño, o AECT Río Miño, os Municipios fronteirizos do Río Miño, a Fundación CEER e o Centro Tecnolóxico do Mar.