![Catrocentos escolares de educación infantil de Tomiño e Cerveira visitan unha granxa-escola](https://eurocidadecerveiratomino.eu/wp-content/uploads/2019/12/visitas-opt2019-01.jpg)
Catrocentos escolares de educación infantil de Tomiño e Cerveira visitan unha granxa-escola
2 Decembro, 2019![A Eurocidade Cerveira-Tomiño premiada pola creación das Valedoras da cidadanía transfronteiriza](https://eurocidadecerveiratomino.eu/wp-content/uploads/2019/12/presentacion-informe-valedoras.jpg)
A Eurocidade Cerveira-Tomiño, premiada pola creación das Valedoras da cidadanía transfronteiriza
11 Decembro, 2019Tomiño e Cerveira clausuran o programa ‘Deporte para todas as persoas’ con grande éxito de participación
![Tomiño e Cerveira clausuran o programa ‘Deporte para todas as persoas’ con grande éxito de participación](https://eurocidadecerveiratomino.eu/wp-content/uploads/2019/12/deporte-para-todas-as-persoas-01.jpg)
Máis de 100 persoas de cada municipio asistiron ás actividades que se desenvolven nas dúas marxes, organizadas pola Eurocidade Cerveira-Tomiño
Coa chegada do mes de decembro, remataron as clases do programa transfronteirizo ‘Deporte para todas as persoas’, organizado pola Eurocidade Cerveira-Tomiño en instalacións municipais de ambos os dous concellos. Máis de 100 persoas tomiñesas participaron nos cursos de ximnasia de mantemento e pilates que cada semana desenvolvéronse en Sobrada (mércores), Tomiño (xoves) e Tebra (venres) e que suscitaron grande interese entre a poboación.
E outro tanto sucedeu en Vila Nova de Cerveira, onde outro centenar de persoas participaron tamén en tres grupos de actividades deportivas gratuítas nos IPSS (Institucións Particulares de Solidariedade Social) dirixidas a un perfil de público diferente, especialmente xente de maior idade.
O programa Deporte para toda as persoas, de carácter piloto, incluíu ademais das modalidades deportivas en parroquias de Tomiño e IPSS de Cerveira, actividades de piscina en familia nas instalacións municipais de Cerveira, con natación e iniciación ao medio acuático para nenas e nenos de 3 a 12 anos, e actividades para maiores de 55 anos, todos os martes en Cerveira e os xoves no local da Asociación Vontade de Tomiño. Ambas as dúas tamén cunha boa acollida por parte da poboación.
Este programa deportivo comezou unha nova tempada en setembro de 2018 e estivo operativo ata novembro deste ano, agás no mes de agosto, no que se fixo un parón estival. Os concelleiros de Deportes e Benestar Social visitaron aos grupos tomiñeses durante a derradeira semana de actividade, e puideron constatar a valoración positiva de alumnas e alumnos e do monitor, quen foron quen de solicitar a continuidade da iniciativa.
Estas actividades deportivas e saudables dirixidas aos veciños e veciñas dos dous municipios forman parte da Axenda Estratéxica para a Cooperación Transfronteiriza Amizade Cerveira-Tomiño, un proxecto cofinanciado ao 75% polo Programa INTERREG VA POCTEP, fondos FEDER da Unión Europea.